|
|
Regaaiern van keunenk Jechizkia (29:1-32:33)
|
2 Kronieken 29
01Jechizkia wer keunenk dou hai vieventwinneg joar was. Hai regaaierde negentwinneg joar in Jeruzalem. Zien moeke haitte van Abia en was n dochter van Zecharja.
02Hai dee wat goud was in de ogen van de HEER, net as zien veurvoader David doan haar.
03In t eerste joar van zien regaaiern, votdoalek in de eerste moand, zette hai de poort van tempel van de HEER weer open en luit de deuren weer moaken.
04Hai luit priesters en Levieten bie nkander roupen op t Oosterplaain.
05"Levieten," zee hai tegen heur, "luster noar mie! Beraaid joezulm veur en schoon de tempel van de HEER, de God van joen veurolden. Dou ales wat nait kouster is tou t haailegdom oet.
06Want ons veurolden binnen ontraauw worden aan de HEER, ons God, en zai hebben doan wat nait goud was in de ogen van de HEER. Ze hebben hom in steek loaten en zok ofkeerd van t hoes van de HEER.
07Zai hebben deuren van de veurhal ofsloten en de lampen oetpoest. Zai hebben in t haailegdom gain wierook meer braand en gain brandovvers meer opdroagen aan de God van Israël.
08Zodounde wer de HEER grammiedeg op Juda en Jeruzalem. Hai het van heur n mikpunt moakt van spot, n oorzoak van angst en verbiestern, zo as ie mit aigen ogen zain hebben.
09Om dij reden binnen ons veurolden mit t sweerd doodmoakt en binnen ons zeuns, ons dochters en ons vraauwen oppakt en votsleept as ballengs.
10 Doarom ben ik nou van plan n verbond mit de HEER, de God van Israël, te sloeten, dat zien grammiedeghaid opholden zel.
11 Doarom, mien zeuns, wacht nou nait laanger. De HEER het joe oetkozen om hom te dainen en hom ovvers te brengen."
12 Dou kwammen de Levieten in t èn: van de femilie van Kehat: Machat, zeun van Amasai, en Joël, zeun van Azarja; van de noazoaten van Merari: Kis, zeun van Abdi, en Azarja, zeun van Jehallelel; van de noazoaten van Gerson: Joäch, zeun van Zimma, en Eden, zeun van Joäch;
13 van de noazoaten van Elisafan: Simri en Jeïel; van de noazoaten van Asaf: Zecharja en Mattanja;
14 van de noazoaten van Heman: Jechiël en Simi; en van de noazoaten van Jedutun: Semaja en Uzziël.
15 Ze raipen heur femilie bie nkander en ze muiken zok ter kloar veur om op t bevel van de keunenk en noar veurschriften van de HEER, tempel van de HEER ritueel te schonen.
16 De priesters gingen tempel van de HEER in om dij te schonen. Zai brochten ale voeleghaid dij zai doar vonden noar t veurplaain van t hoes van de HEER. De Levieten nammen dat van heur over en brochten t wieder noar boeten, noar de Kidronbeek.
17 Op de eerste dag van de eerste moand wazzen ze begund mit t schonen en op de aachtste dag wazzen ze aan de veurhal tou van tempel van de HEER. Veur tempel zulm haren ze nog aacht doag waark, zodat ze der op n zestienden van de eerste moand kloar mit wazzen.
18 Dou klopten ze weer bie keunenk Jechizkia aan en zeden: "Wie hebben t haile hoes van de HEER schoond, ook t brandovveraltoar en toavel veur teunbroden mit aal wat ter bie heurt.
19 Aal t tempelraif dat keunenk Achaz in tied van zien regaaiern deur ofgoderij ontwijd het, heb wie weer veur d' eredainst kloarmoakt. t Staait aalmoal kloar veur t altoar van de HEER."
20 Aanderdoagsmörgens vroug raip keunenk Jechizkia ale bestuurders van de stad bie nkander en ging noar t hoes van de HEER.
21 Zai brochten zeuven jonge bollen, zeuven rammen, zeuven lammer en zeuven segebokjes mit as zundeovver veur t keunenkshoes, veur tempel en veur Juda, om zunden liek te moaken. Jechizkia bestelde de priesters, de zeuns van Aäron, dat ze mozzen dij ovvern op t altoar van de HEER.
22 Zai slachtten de bollen en de priesters vongen t bloud op en goten dat over t altoar. Dou slachtten ze de rammen en goten dat bloud ook over t altoar. Net zo slachtten ze de lammer en wer t altoar ook mit dat bloud begoten.
23 Op t lest brochten ze de segebokjes veur t zundeovver veur de keunenk en aal t volk, en dij legden heur handen op de daaiern.
24 De priesters slachtten ze en goten t bloud as zundeovver over t altoar om zodounde veur hail Israël schuld liek te moaken, want keunenk haar dat brandovver en dat zundeovver veur hail Israël besteld.
25 Dou stelde hai de Levieten in tempel op mit bekkens, haarpen en lieren, noar t veurschrift van David, van de profeet Natan en van Gad, de profeet van de keunenk; dat veurschrift was deur zien profeten ofkomsteg van de HEER.
26 De Levieten stonden kloar mit de meziekinstermenten van David en de priesters mit heur trompetten.
27 Jechizkia gaf opdracht t brandovver op t altoar te leggen en aan te steken. Dou t ovver aanstoken wer, begunden ze n laid veur de HEER te zingen, op trompetten te bloazen en op d'instermenten te speulen van David, keunenk van Israël.
28 De haile gemainschop boog zok omdeel dou t laid en de trompetten klonken, net zo laank as t brandovver duurde.
29 Dou t ovvern doan was, gingen de keunenk en aal dij bie hom wazzen, op knijen en bogen zok daip deel.
30 Keunenk Jechizkia en de bestuurders gavven de Levieten opdracht tot eer van de HEER laiden te zingen van David en de profeet Asaf. Zai begunden mit veul plezaaier te zingen, zai bogen zok deel en gingen op knijen.
31 Jechizkia nam t woord en zee: "Nou heb ie joe haildaal aan de HEER touwijd. Kom dichterbie en breng joen vree-ovvers en daankovvers in t hoes van de HEER." En de haile gemainschop brochde daaiern as vree-ovver en daankovver en wèl dat wol, brochde ook nog brandovvers.
32 De gemainschop brochde seuventeg koubaisten, honderd rammen en twijhonderd lammer in, dij aalmoal bestemd wazzen as brandovvers veur de HEER.
33 Aal mit aal werden der zèshonderd koubaisten en drijdoezend schoapen en segen bestemd as haailege ovvergoaven.
34 Mor der wazzen veul te min priesters om aal dij baisten, dij as brandovver dainen zollen, te villen. Doarom hulpen de Levieten heur mit dat waark, tot ook de aander priesters zok schoond en haailegd haren, want de Levieten haren sekuurder mit dat schonen west as de priesters.
35 Boeten dij brandovvers om haren zai nog n baarg waark mit t vet van de vree-ovvers en mit de wien van de wienovvers.
Dat zodounde wer dainst in t hoes van de HEER vannijs insteld.
36 Jechizkia en t haile volk wazzen slim blied over wat God, veurdat ze der op verdocht wazzen, veur heur kloarmoakt haar.
|
2 Kronieken 30
01Dou stuurde Jechizkia bosschoplopers deur hail Israël en Juda en hai schreef ook braiven noar Efraïm en Manasse. Zai zollen noar tempel van de HEER in Jeruzalem kommen om doar t pesachfeest te vieren tot eer van de HEER, de God van Israël.
02De keunenk haar mit hoge amtenoars en de haile gemainschop in Jeruzalem overlegd en onnaaierd dat zai t feest in twijde moand vieren zollen.
03Zai konden t ja nait op de gewone tied vieren, omreden der haren zok te min priesters ritueel wosken en t volk was nog nait bie nkander in Jeruzalem.
04Keunenk en de haile gemainschop wazzen t ter mit nkander over ains.
05Zai besloten om hail Israël van Berseba tot Dan, op te roupen om noar Jeruzalem te kommen om t pesachfeest te vieren tot eer van de HEER, de God van Israël. t Haar al n hail zet leden west dat zai t vierd haren zo as t heurde.
06Bosschoplopers gingen in opdracht van de keunenk mit braiven van de keunenk zulm en van zien hoge amtenoars deur hail Israël en Juda en raipen de mensken op: "Volk van Israël, keer toch weerom noar de HEER, de God van Abraham, Isaak en Jakob. Den komt hai bie joe weerom, bie joe, luk beetje volk dat aan de keunenk van Assyrië ontkommen is.
07Wees nou nait zo as joen veurolden en joen femilie. Dij binnen ontraauw worden aan de HEER, de God van heur veurolden. Ie hebben zulm zain kind hou de HEER heur tot n veurbeeld van ofschrik moakt het.
08Wees dus nait laanger zo stiefkoppeg as joen veurolden, lang de HEER joen haand tou en kom weer noar zien haaileg hoes, dat hai veur aaltied haaileg moakt het. Wees onderdoaneg aan de HEER, joen God, den zel hai nait laanger zo glìnne verbraand op joe wezen.
09Want as ie joe weer noar de HEER richten, den zellen joen vijanden dij joen femilie en joen kinder in gevangenschop mitnomen hebben, meedlieden mit heur kriegen en heur in dit laand weeromkommen loaten. Want de HEER, joen God, is genoadeg en vol meedlieden. As ie joe weer noar hom richten, zel hai zok nait van joe ofkeren."
10 Dou bosschoplopers in Efraïm en Manasse ale steden bie langs gingen tot aan Zebulon tou, werden zai oetlaagd en bespot.
11 Toch wazzen der gounent van t volk van Aser, Manasse en Zebulon, dij zok deelgavven en noar Jeruzalem gingen.
12 Mor in Juda kwammen ze mit Gods hulp zo wied, dat zai as ain man deden wat de HEER heur deur de keunenk en zien amtenoars opdruig.
13 En zo kwam der in twijde moand n hail bult volk in Jeruzalem bie nkander om t feest van t Ongezuurde Brood te vieren, der was n grode mennegte van mensken op n bainen.
14 Eerst werden de altoars votdoan dij in Jeruzalem stonden, en mit ale wierookaltoars in Kidronbeek smeten.
15 Dou begunden zai t pesachfeest te vieren deur t slachten van lammer op n vattienden van twijde moand. Priesters en Levieten schoamden zok: zai haren zok in tied ook ritueel schoond en konden dou eerst brandovvers brengen in t hoes van de HEER.
16 Zai stonden op heur vaaste ploatsen zo as beschreven ston in de wet van Mozes, man van God. De priesters goten t bloud oet dat de Levieten heur aanlangden.
17 Omdat de mainsten van t volk zok nait ritueel schoond haren, kregen de Levieten de toak om pesachlammer te slachten, veur elk dij nait raain genog was om ze zulm aan de HEER op te droagen.
18 Aalhouwel t grootste dail van t volk, benoam oet Efraïm, Manasse, Issachar en Zebulon, zok nait ritueel schoond haren, atten ze toch zo mor van t pesachovver, tegen ale veurschriften in. Jechizkia beedde veur heur: "Dat de HEER, dij goud is, elk mor vergeven mag,
19 dij zok ter mit zien haile haart tou zet het om God, de HEER, de God van zien veurolden, te zuiken, ook dijent dij zok nait ritueel schoond hebben volgens de veurschriften van dit haaileg hoes."
20 De HEER verheurde Jechizkia en gaf t volk n nije kaans.
21 Op dij menaaier vierden de Isrelieten dij in Jeruzalem wazzen, zeuven doag laank mit veul bliedschop t feest van t Ongezuurde Brood. De priesters en Levieten zongen aal doag loflaiden veur de HEER en speulden oet ale macht op heur meziekinstermenten.
22 Jechizkia sprak ale Levieten tou en prees heur, omdat ze mit veul kennes van zoaken de dainst aan de HEER oetvoerd haren. Zai atten t feestovver zeuven doag laank, zai brochten daankovvers en prezen de HEER, de God van heur veurolden.
23 Dou wer de haile gemainschop t ter over ains om t feest nog zeuven doag deur te zetten. En dat deden ze mit veul bliedschop.
24 Jechizkia, keunenk van Juda, leverde aan de gemainschop nog doezend bollen en zeuvendoezend schoapen en segen en van de hoge amtenoars kreeg de gemainschop ook nog doezend bollen en tiendoezend schoapen en segen. De priesters haren zok nou sikkom aalmoal ritueel schoond.
25 De haile gemainschop van Juda vierde feest mit de priesters en Levieten, mit aal t volk dat oet Israël kommen was en mit ale vremden dij in Israël of in Juda n woonstee vonden haren.
26 Zodounde was ter grode bliedschop in Jeruzalem, want sunt tieden van Salomo, zeun van David en keunenk van Israël, haar der in Jeruzalem nait zukswat te doun west.
27 Dou kwammen de Levitische priesters in t èn en gavven t volk de zegen. Heur stem wer heurd, want heur beden drong deur tot boven in de hemel, Gods haailege woonstee.
|
2 Kronieken 31
01Dou dit aalmoal verbie was, gingen ale Isrelieten dij doar bie nkander wazzen, noar de steden van Juda. Doar sluigen ze de wijde stainen aan groezels en haauwden de haailege Asjerapoalen om. In hail Juda, Benjamin, Efraïm en Manasse broken ze de altoars òf en slichtten ze de ovverhögten, tot ter gain ain meer over was. Dou gingen ale Isrelieten weer noar heur aigen hoes weerom, in heur aigen steden.
02Jechizkia stelde de verschillende ofdailens van priesters en Levieten weer in zo as dat vrouger west haar; elk noar zien aigen toak as priester of as Leviet, om te zörgen veur brandovvers en vree-ovvers, om te dainen en loflaiden te zingen, om de wacht te holden in de poorten van de legerploatsen van de HEER.
03Keunenk gaf n biedroage oet zien aigen bezit veur de brandovvers van smörgens en soavends, veur t ovver op sabbat, t nijmoanfeest en op aander feestdoagen, zo as t veurschreven was in de wet van de HEER.
04Hai legde t volk op, de inwoners van Jeruzalem, om heur biedroagen te levern veur de priesters en Levieten, zodat dij zok haildaal touleggen konden op de wet van de HEER.
05Dou dat bevel aalgemain bekend was, brochten de Isrelieten haile vrachten van t beste koorn, wien, eulie, hunneg en van aal wat t laand opleverde. t Volk gaf n tiende dail van aal wat ze haren.
06Boetendes druigen de Isrelieten en Judeeërs oet de steden van Juda ook n tiende dail van heur koubaisten en heur schoapen en segen òf, en ook de tienden dij as wijgeschenken veur de HEER, heur God, bedould wazzen. Haile stoapels muiken zai der van.
07In daarde moand begunden zai mit t aanleggen van dij stoapels en eerst in zeuvende moand wazzen zai der kloar mit.
08Dou Jechizkia en zien hoge amtenoars kwammen en dij stoapels zagen, daankten zai de HEER en zien volk Israël.
09Jechizkia vruig de priesters en Levieten noader oetleg over dij veurroaden.
10 Hogepriester Azarja, oet femilie van Sadok, legde hom t oet: "Van t begun òf aan dat mensken heur goaven noar tempel toubrocht hebben, haren wie eten in overvloud, wie konden alderdeegs nog goud wat overholden. De HEER het zien volk ja zo zegend dat wie zo'n baarg overholden konden."
11 Jechizkia bestelde dou, dat ter veurroadkoamers in t hoes van de HEER kloarmoakt worden mozzen, en zo gebeurde dat.
12 De biedroagen en tienden en wijgeschenken werden doar in vaaste regelmoat binnenbrocht. De Leviet Konanjahu haar t touzicht der over en zien bruier Simi was twijde man.
13 Onder laaiden van Konanjahu en zien bruier Simi wazzen Jechiël, Azazjahu, Nachat, Asaël, Jerimot, Jozabad, Eliël, Jismachjahu, Machat en Benaja, belast mit t touzicht. Zai wazzen aalmoal aansteld deur keunenk Jechizkia en Azarja, hogepriester in t hoes van God.
14 Kore, n zeun van Jimna, dij n Leviet was en poortwachter aan de Oosterpoort, mos touzicht holden op t verdailen van de vrijwillege goaven aan God, van de biedroagen veur de priesters en van de wijgeschenken.
15 In de priestersteden wer hai traauw hulpen deur Eden, Minjamin, Jesua, Semaja, Amarja en Sechanja; dij zörgden veur t oetdailen aan heur femilie in ale ofdailens, lutjekes net zo goud as groten.
16 (Van dij femilies stonden noamelk ale manlu van drij joar en older as priester inschreven.) Zo kreeg elk zien paart, en nait allenneg dijent dij volgens t reuster de doagliekse dainsten in tempel van de HEER doun mozzen.
17 De priesters wazzen in t register inschreven noar heur femilies, mor de Levieten van twinneg joar en older elk noar zien ofdailen en zien toak.
18 Zai werden inschreven mit heur haile femilie, mit vraauwen, zeuns en dochters, zai wijdden zok ja traauw aan heur haailege opdracht.
19 De priesters dij ofstamden van Aäron en dij op t laand bie heur steden woonden, haren in elke stad manlu aansteld. Dij mozzen aan de manleke leden van de priesterstand en aan de Levieten dij inschreven wazzen, heur aandail in de goaven geven.
20 Zo ging Jechizkia in hail Juda te waark, goud, rechtschoapen en traauw aan de HEER, zien God.
21 En aal t waark dat hai dee veur de eredainst in tempel van God, veur de wet en de geboden, om zien God te eren, dat dee hai mit zien haile haart. Zo kwam t aalmoal goud veurnkander.
|
2 Kronieken 32
01n Zet loater, dou Jechizkia zien traauw aan de HEER zain loaten haar, kwam Sanherib, keunenk van Assyrië, op Juda òf. Hai belegerde de verstaarkte steden mit bedoulen ze mit geweld in te nemen.
02Dou Jechizkia aankommen zag, dat Sanherib van plan was om Jeruzalem aan te valen,
03ging hai in beroad mit zien hoge amtenoars en legerofsieren om de wèlputten boeten stad dicht te stoppen en zai beloofden hom te helpen.
04Zai brochten n bult volk op n bainen en ale wèlputten werden dichtstopt, ook de wotterlopen in kontrainen om stad tou. Zai dochten bie zokzulm: Woar is t goud veur, dat keunenk van Assyrië zoveul wotter vindt, as hai hier komt?
05Mit man en macht muiken ze de swakke steeën in stadsmuur weer in odder, toorns werden hoger optrokken en der wer nog n twijde muur om stad tou baauwd. Boetendes muik Jechizkia t Millobolwaark bie Davidstad nog veul staarker en luit hai de wereld speren en schilden moaken.
06Wieder stelde hai kommedanten aan over de börgerwacht, luit t volk bie nkander kommen op t plaain veur de stadspoort en sprak heur moud in:
07"Wees staark en heb goie moud, loat joe gain schrik aanjoagen deur de keunenk van Assyrië en deur t volk dat bie hom is. Wie binnen ja staarker as hai.
08Hai rekent op menskenkracht, mor wie maggen reken op de HEER, ons God, dij ons helpt en veur ons vecht!" Deur dizze woorden van keunenk Jechizkia van Juda, vuilde t volk zok staark.
09n Zetje loater stuurde keunenk Sanherib van Assyrië, dij mit zien haile leger veur Lachis lag, gezanten noar Jeruzalem mit n bosschop veur keunenk Jechizkia van Juda en veur ale Judeeërs dij in Jeruzalem wazzen.
10 "Dit zegt Sanherib, keunenk van Assyrië: 'Woar vertraauw ie aiglieks op dat ie joe opsloeten loaten in Jeruzalem?
11 Het dij Jechizkia joe nait dik veur de gugel, as hai zegt: 'De HEER, ons God, zel ons redden oet de klaauwen van de keunenk van Assyrië'? Zel hai joe nait van honger en dörst omkommen loaten?
12 Het dij aigenste Jechizkia der nait veur zörgd dat ovverhögten en altoars van de HEER ofbroken en slicht binnen? Het hai nait tegen Juda en Jeruzalem zegd: 'Allenneg veur ain altoar mag ie joe deelboegen en doar ovvers op aansteken'?
13 Wait ie den nait wat ik en mien veurolden doan hebben mit de volken van aander landen? Hebben de goden van dij aander volken heur landen oet mien handen redden kind?
14 Het sums ain van de goden van dij aander volken dij mien veurolden in de ban doan hebben, zien volk oet mien handen redden kind? Zol joen God dat den aal kinnen?
15 Nou den, loat joe toch nait deur Jechizkia bedraigen en opsteukeln. Leuf nait wat hai zegt. Gain god van wat volk of keunenkriek ook, het zien volk oet mien handen redden kind of oet handen van mien veurolden. Zol joen god joe den aal redden kinnen?"
16 Zo gingen Sanherib zien ofgezanten nog n zetje deur mit heur schampere proaterij over God, de HEER, en zien knecht Jechizkia.
17 Boetendes schreef Sanherib braiven doarin hai swoar de spot mit de HEER, de God van Israël, dreef. Hai zee doarin: "Net zo min as de goden van de aander landen heur volk oet mien handen redden konden, zel de God van Jechizkia zien volk oet mien handen redden."
18 Zai leesden dij braif hail haardop en in t Judees veur aan t volk dat op de muur van Jeruzalem ston. Zai wollen heur baang moaken en heur schrik aanjoagen om zo de stad in handen te kriegen.
19 Zai haren t over de God van Jeruzalem net zo as ze pruiten over de goden van aander volken. Mor dij wazzen deur menskenhanden moakt.
20 Dou gingen keunenk Jechizkia en profeet Jesaja, n zeun van Amos, in gebed en zai raipen de hemel aan om hulp.
21 De HEER stuurde n engel en dij brochde ale weerboare helden, ale vorsten en aanvoerders in t leger van keunenk van Assyrië om haals. De keunenk keerde mit schoamte op koaken noar zien laand weerom. Dou hai op n keer in tempel van zien aigen god kwam, hebben zien bloudaigen zeuns hom mit t sweerd om t leven brocht.
22 Zo redde de HEER Jechizkia en de inwoners van Jeruzalem oet de handen van Sanherib, keunenk van Assyrië, en van aander vijanden. Hai gaf heur rondomheer rust.
23 n Bult mensken kwammen noar Jeruzalem mit ovvergoaven veur de HEER en kostboare geschenken veur keunenk Jechizkia van Juda. Van dij tied òf aan ston hai bie ale volken hoog in aanzain.
24 Om dij tied wer Jechizkia doodzaik. Hai beedde tou de HEER en dij gaf hom as antwoord n wondertaiken.
25 Mor Jechizkia druig zien haart te hoog en was nait dankboar veur de weldoad dij de HEER aan hom doan haar. Dat was van dij gevolgen dat ter van God n glìnne kwoadhaid over hom en over Juda en Jeruzalem kwam.
26 Mor Jechizkia boog zien trötse kop en de inwoners van Jeruzalem ook, zodat in de tied van Jechizkia de kwoadhaid van de HEER heur nait ruik.
27 Jechizkia was riek, schatriek, elk keek hom noar ogen. Hai luit zok schatkoamers baauwen veur zulver, gold en edelstainen, veur kruden, veur schilden en aander kostboar raif.
28 Wieder opslagploatsen veur de opbrengst van koorn, wien en eulie, staalroemte veur alderhande soorten vij mit onderdak veur zien kuddes.
29 Hai haar zok steden baauwen loaten en haar n grode vijstoapel van schoapen, segen en rundvij. God haar hom ja grode bezittens geven.
30 Dij aigenste Jechizkia haar ook bovenste oetloop van de Gichonwèl ofsloten en luit nou t wotter onder de grond deur noar westzied van de Davidstad lopen. Bie ales wat e dee, ging hom t veur de wind.
31 Dou der n moal ofgezanten van de vorsten van Babel bie hom kwammen om te vroagen noar t wondertaiken dat in zien laand gebeurd was, luit God hom even in steek om hom oet te perbaaiern. Hai wol waiten wat ter in zien haart leefde.
32 Ale aander verhoalen over Jechizkia en over zien vrome doaden, stoan beschreven in viziounen van profeet Jesaja, zeun van Amos, en in t bouk van de keunenks van Juda en Israël.
33 Jechizkia sturf en wer begroaven in de bovenste grafkoamers doar de noazoaten van David liggen. Hail Juda en ale inwoners van Jeruzalem brochten hom leste eer. Zien zeun Manasse wer keunenk in zien stee.
|
2 Kronieken 33
01Manasse was twaalf joar dou hai keunenk wer. Hai regaaierde vievenfiefteg joar in Jeruzalem.
02Hai dee wat kwoad was in de ogen van de HEER. Hai dee ja mit aan dij aigenste ofgoderij as de volken dij de HEER nou net veur de Isrelieten votjagd haar.
03De ovverhögten dij zien voader Jechizkia ofbroken haar, baauwde hai vannijs weer op. Hai richtte weer altoars veur Baäl op, zette der weer nije Asjerapoalen hèn en boog zok deel veur zun, moan en steerns om dij te dainen.
04Wieder baauwde hai alderdeegs altoars in t hoes van de HEER, doar de HEER zulm van zegd haar: "In Jeruzalem zel mien noam veur aaltied wonen."
05Op baaide veurplaainen van tempel baauwde hai altoars veur t vereren van zun, moan en ale steerns.
06Hai luit zien zeuns in t Hinnomdaal deur t vuur verbranden, luit zok in mit wikkerij, mit woarzeggerij en teuverderij en mit t besweren van doden en gaisten. Hai dee n bult wat kwoad was in de ogen van de HEER om hom te taargen.
07Hai muik ook n ofgodsbeeld en zette dij in tempel van God. God haar tegen David en zien zeun Salomo zegd: "In dit hoes hier in Jeruzalem, de ainegste stad dij ik oet ale stammen van Israël oetkozen heb, zel ik mien noam veur aiweg wonen loaten.
08Ik zel de Isrelieten nooit weer votjoagen van dit laand dat ik aan heur veurolden geven heb. Dat geldt allain as zai zok sekuur aan mien wetten, geboden en regels holden, dij ik heur deur Mozes besteld heb."
09Mor Manasse brochde t volk van Juda en de inwoners van Jeruzalem haildaal op biesterboan, zodat zai nog meer kwoad deden as de volken dij de HEER veur de Isrelieten oetreud haar.
10 De HEER woarschaauwde Manasse en zien volk aal, mor zai wollen nait lustern.
11 Dou stuurde de HEER de legeraanvoerders van de keunenk van Assyrië mit zien troepen op hom òf. Dij vongen Manasse mit hoaken, bonden hom mit kopern kettens vaast en zo wer Manasse noar Babel sleept.
12 Dou Manasse zo deur de HEER in t naauw brocht wer, perbaaierde hai de HEER, zien God, te verbeden. Hai gaf zok haildaal deel veur de God van zien veurolden.
13 Hai beedde tou hom, en God luit zok deur hom verbeden. Hai heurde zien smeekgebed en brochde hom weer noar Jeruzalem op zien troon. Dou wol Manasse wel tougeven, dat de HEER allain God is.
14 Noatied baauwde hai n twijde boetenmuur om de Davidstad tou, aan westzied van Gichon, deur de leegte, kaant van Vispoort op en den om de Ofel tou. Hai muik der n hail hoge muur van. Wieder stelde hai kommedanten aan in ale vestingsteden van Juda.
15 En hai gooide ale vremde goden en t stainen beeld tou tempel van de HEER oet en brook ook ale altoars òf dij hai baauwd haar op de tempelbaarg in Jeruzalem, en smeet ze tou stad oet.
16 Hai baauwde t altoar van de HEER vannijs weer op en ovverde doar vree-ovvers en daankovvers. Ook druig hai t volk van Juda op om de HEER, de God van Israël, te dainen.
17 Evenzogoud bleef t volk nog ovvern op de ovverhögten, mor nou aan de HEER, heur God.
18 Aal t aander over Manasse, over t gebed dat hai noar zien God richtte en de woorden dij de profeten tegen hom zegd hebben in noam van de HEER, de God van Israël, t is aalmoal optaikend in de kronieken van de keunenks van Israël.
19 Zien gebed en hou God zok verbeden luit, aal zien zunden en ontraauw, ale ploatsen doar hai ovverhögten baauwd haar en doar hai de Asjerapoalen en godenbeelden oprichtte, veurdat hai zok deelgeven haar, t staait aalmoal beschreven in de kronieken van Chozai.
20 Manasse sturf en wer in zien pelaais begroaven. Zien zeun Amon wer keunenk in zien stee.
21 Amon was twijentwinneg joar dou hai keunenk wer en hai regaaierde twij joar in Jeruzalem.
22 Hai dee wat kwoad was in de ogen van de HEER, net zo as zien voader Manasse doan haar. Amon ovverde aan ale beelden dij zien voader Manasse moaken loaten haar en vereerde dij.
23 Mor hai gaf zok nait deel veur de HEER, zo as zien voader Manasse doan haar. Hai, dij Amon, muik zien schuld allain mor groder.
24 Zien knechten muiken n komplöt tegen hom en muiken hom dood in zien aigen pelaais.
25 Mor t volk in t laand brochde elk dij mit dij soamensweren tegen keunenk Amon mitdoan haar om haals, en t muik zien zeun Josia keunenk in zien stee.
|
2 Kronieken 34
01Josia was aacht joar dou hai keunenk wer en hai regaaierde ainendatteg joar in Jeruzalem.
02Hai dee wat goud was in de ogen van de HEER en leefde noar t veurbeeld van zien veurvoader David, hai week doar op gain enkele menaaier van òf.
03In t aachtste joar van zien regaaiern, dou hai nog mor n jongkerel was, begunde hai de God van zien veurvoader David te vereren. In t twaalfde joar van zien regaaiern begunde hai Juda en Jeruzalem te schonen van de ovverhögten, van de Asjerapoalen en van de beelden dij ze sneden of goten haren.
04Doar haizulm bie was, werden de Baälsaltoars ofbroken en de wierookbranders dij doar bovenop stonden, kepothaauwen. De Asjerapoalen en de sneden en goten beelden werden aan groes sloagen en oetstreud over de groaven van dij doar ovverd haren.
05De bonken van de ofgodspriesters werden op heur aigen altoars verbraand. Zo muik hai Juda en Jeruzalem kouster.
06En in de steden van Manasse, Efraïm, Simeon en alderdeegs in dij van Naftali, werden de haailegdommen noakeken.
07Overaal in Israël brook hai de altoars òf en sluig hai de Asjerapoalen om. Hai sluig de beelden aan groezels en smeet de wierookbranders tegen de vlakte. Dou keerde hai noar Jeruzalem weerom.
08In t achtiende joar van zien regaaiern, dou hai drok aan gaang was om laand en tempel te schonen, gaf hai opdracht aan Safan, n zeun van Asaljahu, en aan Maäseja, stadskommedant, en aan stadssiktoares Joäch, zeun van Joächaz, om tempel van de HEER, zien God, weer in odder te moaken.
09Zai gingen noar hogepriester Chilkia tou en langden hom t geld over dat de Levieten, dij touzicht haren op de ingang van de tempel beurd haren. Dat was bie nkander brocht deur t volk van de stammen Manasse en Efraïm en t aander dail van Israël, wieder deur t volk van Juda en Benjamin en deur de inwoners van Jeruzalem.
10 Zai gavven dat aan de opzichters dij aansteld wazzen om touzicht te holden op t waark aan de tempel van de HEER en dij langden dat weer over aan t waarkvolk dat aan t waark was om t hoes van de HEER op te klandern en te verbetern.
11 Zai gavven dat aan timmerlu en opperlu om blokken noatuurstain te kopen en baalkholt veur de gebinten en plaankholt veur de zoldervlouers, dij aalmoal deur de keunenks van Juda verwoarloosd wazzen.
12 Dij manlu deden heur waark op n sekure menaaier. Zai stonden onder touzicht van Jachat en Obadja, Levieten van t geslacht Merari, en van Zecharja en Mesullam, dij van t geslacht Kehat wazzen. De Levieten dij kundeg wazzen in t bespeulen van meziekinstermenten,
13 haren touzicht op de sjaauwers. Zai haren ook de laaiden over ale aander waarklu van netgliek wat veur toak. Weer aander Levieten wazzen schriever of amtenoar of poortwachter.
14 Dou ze t geld bie nkander zöchten dat in de tempel van de HEER binnenbrocht was, von priester Chilkia de boukrol mit wet van de HEER, dij deur Mozes deurgeven was.
15 Chilkia toalde schriever Safan hierover aan: "Ik heb dizze wetsrol in tempel van de HEER vonden." En hai gaf t bouk aan Safan.
16 Safan ging der mit noar de keunenk en dee hom wieder verslag: "Aal wat joen knechten opdroagen is, dat hebben ze doan.
17 Ze hebben t geld dat ze in t hoes van de HEER vonden hebben, overdroagen aan de opzichters en t waarkvolk."
18 Boetendes vertelde schriever Safan aan de keunenk: "Priester Chilkia het mie n bouk geven." En hai leesde de keunenk doaroet veur.
19 Dou de keunenk veurlezen heurde wat ter in de wet ston, scheurde hai zien klaaier kepot.
20 De keunenk bestelde aan Chilkia, aan Achikam, Safan zien zeun, aan Abdon, n zeun van Micha, aan Safan, de schriever zulm, en aan Asaja, zien adjudant:
21 "Goa bie de HEER te roade veur mie en veur t volk dat in Israël en Juda overbleven is, over de inhold van t bouk dat vonden is. De HEER mout wel glìnne kwoad op ons wezen, omdat ons veurolden zok niks van t woord van de HEER aantrokken hebben, omdat ze nait leefd hebben noar wat in dit bouk opschreven staait."
22 Chilkia ging mit de aander lu dij deur de keunenk aanwezen wazzen, noar de profetes Chulda tou, de vraauw van Sallum - Sallum haar de zörg over de priesterklaaier, hai was n zeun van Tokhat en dij weer n zeun van Chasra - . Chulda woonde in n nije kluft van Jeruzalem. Dou zai Chulda verteld haren van heur opdracht,
23 antwoordde dij: "Dit zegt de HEER, de God van Israël: Zeg tegen de man dij joe hierhèn stuurd het:
24 'De HEER zegt joe: Ik zel rampen brengen over dizze stad en heur bewoners, mit ale vervluikens dij in t bouk stoan dat aan de keunenk van Juda veurlezen is.
25 Want zai hebben mie rug toudraaid en ovvers brocht aan vremde goden om mie te taargen mit dij aigengemoakte godenbeelden. Doarom zel mien gramschop over dizze stad lösbranden en dij zel nait meer oetblust worden.'
26 Zeg doarom mor tegen de keunenk van Juda, dij joe stuurd het om de HEER om road te vroagen: 'Dit zegt de HEER, de God van Israël, hierover:
27 Omdat ie joe t zulm zo aantrokken hebben, omdat ie joe veur God vernederd hebben bie t heuren van zien woorden over dizze stad en zien inwoners, omdat ie joe vernederd hebben en joen klaaier scheurd en reerd veur mien ogen, doarom heb ik nou noar joe lusterd.
28 Ik zel joe mit joen veurolden bie nkander brengen en ie zellen in ale vree in joen graf biezet worden. Ie zulm zellen niks vernemen van aal t kwoad dat ik over dizze stad en zien inwoners brengen zel.'"
Dij bosschop brochten zai de keunenk over.
29 Dou luit de keunenk ale oldsten van Juda en Jeruzalem bie nkander roupen.
30 Hai ging mit ale inwoners van Juda en Jeruzalem noar tempel van de HEER, mit de priesters en de Levieten en mit aal t volk, jong en old. Hai leesde heur ales veur wat ter opschreven ston in t bouk van t verbond dat in t hoes van de HEER vonden was.
31 De keunenk ging op zien vaaste stee stoan, en sloot n verbond en de HEER was getuge: hai zol de HEER volgen, hai zol zok mit zien haile haart en ziel aan zien geboden, regels en veurschriften holden en hai zol de woorden van t verbond oetvoeren, zo as dij in de boukrol opschreven stonden.
32 En hai luit elk dij doar was oet Jeruzalem en Benjamin in t èn kommen en zok aansloeten. Ale inwoners van Jeruzalem huilen zok aan t verbond mit God, de God van heur veurolden.
33 Josia dee ale iezelke ofgodsbeelden oet ale landstreken van Israël vot en brochde ale Isrelieten zo wied dat ze de HEER heur God begunden te dainen. Zolaank as Josia leefde, bleven zai traauw aan de HEER, de God van heur veurolden.
|
|
